Politika e “ekspertëve” të qeverisë për testime minimale mund të mbajë mbi vete një risk të madh. Ajo rrezikon të fshehë gjendjen reale të të infektuarve me Covid-19 në vend. Disa raste episodike që natyrisht nuk përbëjnë statistikë, të bëjnë të ngresh dyshime se shifrat që i raportohen publikut janë shumë larg asaj që ndodh në terren.

Dy qytetarë përplasen me makinë, plagosen, shkojnë në spital dhe rezultojnë të infektuar. Një pacient shtrohet me urgjencë për arsye të tjera dhe del me Covid-19. Një kontroll rutinë në Aranitas të Mallakastrës, nxjerr pozitive një infermiere. Kryeopozitari Basha denoncon vatër infeksioni në një një fasoneri në  Fushë Krujë, ministrja e Shëndetësisë e mohon, pastaj del e vërtetë.

Natyrisht askush nuk ka fakte apo të dhëna se qeveria ka një politikë të fshehjes së rasteve ashtu sikurse ndodhi në fillim të pandemisë në Huan të Kinës. Prandaj akuzat e opozitës tani për tani mbeten vetëm një hipotezë e pa vërtetueshme.

Dhe kjo është një shifër tepër e vogël që popullsia të ndihet e kërcënuar nga sëmundja. Këto shifra të tkurrura rrezikojnë të ngjallin ndjenjën e nënvlerësimit të rrezikut në popullatën e gjerë, duke bërë që edhe vigjilenca ndaj masave shtrënguese të dobësohet.

Pra “politika e ekspertëve” me pak testime dhe me numër të vogël zyrtar të infektuarish bie kryekëput ndesh me masat represive të qeverisë me burgime, ushtri në rrugë dhe shtet rrethim. E para e dëmton rëndshëm të dytën./LAPSI