25 prilli do të jetë një referendum ku pjesëmarrja do të jetë shumë masive. Kjo është bindja e presidentit Ilir Meta.

I ftuar në “Tempora”, kreu i shtetit, teksa u pyet nga gazetarja Sonila Meço se kush do ta garantojë votën për shqiptarët më 25 prill, dha fjalën se nëse nuk respektohet Marrëveshja e 5 Qershorit, e diela e 25 prillit do të kthehet në referendum.

Ilir Meta: Zotëria të bëjë çfarë të dojë tani. Votën për shqiptarët do e garantojë populli shqiptar. Presidenti do të jetë në krye të popullit shqiptar. Populli shqiptar do të marshojë drejt kutive të votimit më 25 prill. Sado të përpiqen, ta pengojë, ta intimidojë, ta frikësojë, kjo gjë ka përfunduar. Mos ki merak se populli ka ato rregullat e veta të lojës.

Kështu ishte edhe Markosi, por kur doli populli I tha “O vagabond, nuk të thamë të shkosh deri këtu. Merr helikopterin dhe… Vazhdo andej se të lame në dorë të popullit.” Kur del populli në rrugë, nuk ka diktatorë… Dakord?

Sonila Meço: Mendoni se, pjesëmarrja do të jetë masive?

Ilir Meta: Do të jetë pjesëmarrja më e madhe në historinë e Shqipërisë. Të jap fjalën. Me not do vijnë nga Italia. Do vijnë në këmbë shqiptarë nga Greqia, nga e gjithë Shqipëria, nga kudo. Të gjithë do vijnë. Nëse nuk respektohet 5 qershori dhe vazhdohet me këtë kështu, do të jetë referendum.