Lëvizja Socialiste për Integrim përmes nënkryetarit të saj, Petrit Vasili, deklaron se vota e 25 prillit kundër kësaj qeverie, është një fuqi e jashtëzakonshme për të mbrojtur Shqipërinë nga grabitqarët e Dubait.
“I gjithë opinioni ka qenë tepër i tronditur nga ato çka parë dhe që lidheshin me Dubain ku qeveria shqiptare haptas demonstronte oreksin e saj të pashembullt për të ndarë Shqipërinë. Pak ditë më parë, publikisht nga kjo foltore i kemi bërë thirrje SPAK-ut që të lëvizë në mënyrë të rrufeshme dhe të hedhë dritë mbi këtë aferë të jashtëzakonshme të një grabitje shtetërore të paparë në 109 vitet e fundit, ku qeveri dhe parlament si një bashkë-hajdutësi e pashembullt bëhen bashkë për të ndarë Shqipërinë.
Pas tenderëve të pafund sekretë, u arrit dhe sigurisht procedurave të pafund të prokurimit të paracaktuar përfitues, kulmi arrin kur edhe marrëveshjet ndërkombëtare bëhen praktikisht me emra dhe mbiemra, me prona të përcaktuara dhe me shpronësim individual të shqiptarëve. Pra, shqiptarëve u merret prona e tyre private. Është fare e qartë që kjo qeveri e ndan Shqipërinë si të jetë malli i saj dhe sikur ata të jenë pronarët e saj dhe jo administratorët e saj.
Në darkën e famshme të Dubait, kushdo që ka qenë i pavëmendshëm, ka kujtuar se ka parë gjellë në tavolinë, por është e kundërta. Në tavolinën e Dubait menyja ka qenë Shqipëria. Një antipastë ka qenë saktësisht Durrësi dhe qindra hektarë përqark tij. Një pjatë kryesore biftek ka qenë Vlora, Saranda e Ksamili. E për ta mbyllur ëmbëlsira ka qenë Përmeti. Projekte të shkruara në marrëveshje, e cila sikurse janë dakordësuar bashkë-hajdutët e qeverisë dhe të Parlamentit është e tillë ku për të gjithë këto projekte, nuk do ti nënshtrohen thonë prokurimit publik, nuk do ti nënshtrohen tenderit publik, nuk do ti nënshtrohen procedurës konkurruese publike dhe as një procedure tjetër.
Pra, shitet Shqipëria atij që i pëlqen dhe atyre që ua mbushin xhepin plot qeveritarëve. Një procedurë dhe një grabitje shtetërore e përmasave të tilla nuk është parë dhe nuk ka guxuar asnjë qeveri ta kryejë kurrë më parë. Dhe kjo provohet që në darkën e Dubait, përveç kësaj menuje ka pasur dhje një menu ekstra për të ndarë dhe pjesët e tjera të Shqipërisë e cila është e bukur dhe me vlera të jashtëzakonshme pasi jo rastësisht kishte përfaqësues të Bashkisë së Tiranës, përfaqësues të Kryeministrisë pa asnjë lidhje me çështjen, oligarkë e të tjerë persona.
Pra menuja e Dubait ishte këto tre projekte i hëngrëm po ka dhe plot të tjera për të ngrënë. Pra Shqipëria është e tyre dhe mund ta hanë dhe ta shpërdorojnë, ta grabisin si të duan ata. Sigurisht një nga referimet që ata kanë bërë në marrëveshje ka qenë dhe ligji famë zi i investimeve strategjike i cili është shtetëzim komunist prej mafies rilindëse. Që do të thotë rrëmbim i pronës individuale të çdo shqiptari që ai mos të ndihet zot në pronën e tij, që prona e tij të jetë pa asnjë vlerë sepse merret shpronësohet dhe rrëmbehet dhe nëse u pëlqen mund tu japin një kothere që është dhjetëra herë me pak se vlera e saj pra rikthim i shtetëzimeve komuniste të cilët varfëruan shqiptarët dhe i çuan ata në kufijtë e atij mjerimi të cilin e kemi parë dhe përjetuar të gjithë në vitet 90, paradoksalisht një Shqipëri pluraliste, demokratike të vitin2021.
Sigurisht të gjithë qytetarët nuk duhet të jenë as të dëshpëruar dhe as të mërzitur e pashpresë, pas kanë një dorë një fuqi të jashtëzakonshme, që është vota e tyre e 25 prillit ku ata kane mundësinë e pakthyeshme e të madhe për të mbrojtur Shqipërinë por dhe veten. 25 prilli është arma për të mbrojtur Shqipërinë nga grabitja që po i bëhet pafund asaj por dhe për të mbrojtur veten pasi çdo pronë dhe çdo e drejtë është tashmë e rrezikuar dhe në duart e këtyre grabitqarëve të pangopur të cilët shesin e blejnë pa principe çdo gjë e për të cilën Shqipëria ka vlerë vetëm për xhepin e tyre, janë gati tua rrëmbejnë çdo gjë shqiptarëve. Mos harroni asnjëherë, 25 prilli është dita për të mbrojtur Shqipërinë dhe veten”, deklaroi nënkryetari i LSI-së, Petrit Vasili.
