Kryetari i degës lokale të PD në Fier, deputeti Luan Baçi dhe anëtarë demokratë kanë protestuar ditën e sotme kundër uzurpimit të zyrave të selisë së PD nga njerëz të dërguar nga Lulzim Basha.

Derës së selisë i është ndërruar brava dhe çelësat i janë dorëzuar drejtuesit të komanduar, Agron Kapllanaj. Baçi thotë se nuk e njeh komandimin e bërë nga kryedemokrati Lulzim Basha.

Ndërrimin e bravës së derës, Baçi e konsideron një veprim të turpshëm, ndërsa thekson se janë futur me kaçavida për ta ndërruar.

Luan Baçi ka konfirmuar edhe njëheërë se do të marrë pjesë në Kuvendin Kombëtar të thirrur nga ish-kryeministri Sali Berisha në datën 11 dhjetor.

“Sot ka ardhur momenti që të denoncohet ky veprim i turpshëm dhe ofendues për të gjithë. Sekretari i degës dhe Sekretari Organizativ erdhën të kryenin disa veprime, për të marrë disa karta dhe gjendën dyert e mbyllura. Për këtë arsye u bë dhe denoncimi në polici. Nuk ka punë mirëkuptimi, dega vazhdon aktivitetin e vet. PD nuk është aty ku janë zyrat, por aty ku janë njerëzit. Më 11 dhjetor do të ketë një pjesëmarrje të madhe delegatësh, është dëshira e vetë delegatëve e të gjithë anëtarëve që të jenë pjesë.

Ju e keni parë vetë, foltorja që u bë e dyta ishte Fieri pas Tiranës dhe e patë se çfarë pjesëmarrjeje kishte. Bashkërisht do t’ia dalim mbanë pasi unë nuk jam për ndarjen e PD-së. Kundërshtari ynë është Edi Rama. Mund t’i merrni edhe zotërinjtë në pyetje. Unë nuk e njoh fare atë komandimin që ka bërë Basha, nuk e njoh. Zyrat i ka uzurpuar një ekip që erdhi nga Tirana, u futën me kaçavida e ndërruan bravat. I gjithë problemi i degës së Fierit është me qendrën. PD janë anëtarët, nuk janë as zyra dhe as vula. Mund ta merrni dhe ju vulën dhe të thoni që jeni PD-ja, por nuk jeni, ju jeni gazetarë”, tha Baçi