Një ditë para protestës së madhe kombëtare të demokratëve, deputeti Lulzim Basha ka deklaruar se nuk do ta lëshojë selinë e Partisë Demokratike, duke sfiduar kështu vullnetin e anëtarësisë që e shkarkoi atë me referendumin e 18 dhjetorit. Kërkesave të arsyeshme të ndërkombëtarëve për largimin e tij, Basha iu përgjigj duke thënë se tashmë ai nuk do të negocojë, VETËM me Sali Berishën.

Deputeti Lulzim Basha ka sfiduar shumicën dërrmuese të anëtarësisë së Partisë Demokratike që ka votuar për shkarkimin e tij duke deklaruar se nuk do ta lëshonte selinë e Partisë Demokratike.

Një ditë para protestës së madhe kombëtare Lulzim Basha konfirmoi se u ka ngritur pritë demokratëve të cilët do protestojnë nesër paqësisht për rikthimin e legjitimitetit në forcën kryesore të opozitës.

Basha ka përsëritur akuzat ndaj liderit historik të demokratëve Sali Berisha dhe nuk ka ngurruar ta cilësojë qeverisjen 8-vjeçare të demokratëve si të korruptuar, duke thënë se nuk do lejonte hyrjen e ish-zyrtarëve të korruptuar në seli.

Kërkesave të arsyeshme të ndërkombëtarëve për largimin e tij, Basha iu përgjigj sot duke thënë se tashmë ai nuk do të negociojë vetëm me Sali Berishën.

"Dua të përsëris se ndërsa nuk jam më i hapur për asgjë ndaj personit të shpallur non grata, që ka venë hallin e tij, mbi interesat e demokratëve dhe të Shqipërisë, jam i gatshëm të dëgjoj dhe po dëgjoj, po reflektoj e do të vazhdoj të reflektoj me qëndrime e vendime demokratike ndaj kritikave, kundërshtimeve, kërkesave dhe propozimeve që forcojnë bashkimin tonë në diversitet, që shërbejnë për modernizimin e Partisë Demokratike dhe fitoren e saj", tha deputeti Basha