Sa i përket aksionit disa mujor të opozitës, Gjekmarkaj tha se ai përfundoi me zgjidhjen e kërkesave të pakicës parlamentare si edhe me njohjen e “opozitës së vërtetë” nga aleatët ndërkombëtarë. 

Ai komentoi edhe arrestin në shtëpi të ish-kryeministrit Sali Berisha, duke thënë se ai është i vetmi politikan në Evropë sot që mbahet nën arrest pa akuzë dhe pa dënim.

“Sali Berisha është sot i vetmi politikan në arrest shtëpie pa akuzë dhe pa dënim. Secili mund t’i bëjë pyetje vetes si mund të konsiderohet arrestimi i tij, kur Kushtetua e mbron deputetin nga çdo vendim gjykatash pa miratim Kuvendi. Kjo ndodhi me Berishën dhe Kuvendi certifikoi atë që gjykata bëri gabim. Berisha është kryetari i PD, ne jemi bashkuar me diversitet, ku na bashkon historia e PD”, tha ai.

Duke u ndalur te komisionet parlamentare hetimore, Gjekmarkaj theksoi se opozita është vendosur aty për të bërë transparencë për aferat që do të hetohen dhe se nga pikëpamja morale ajo do të jetë një betejë e fituar për opozitën.

“Komisionet hetimore do të bëjnë transparencë, opozita është aty për të bërë transparencë për 200 milionë eurot e Sterilizimit dhe dritëhijeve të tjera. Nëse Parlamenti nuk e voton raportin, në fund dilet me dy raporte dhe është çështje vullneti e mazhorancës për të ruajtur eksponentët e saj. Beteja e opozitës do të jetë e fortë dhe nga pikëpamja morale do jetë betejë e fituar”, u shpreh Gjekmarkaj.

Sa i takon Reformës Zgjedhore, nga studio e Neës24, Gjekmarkaj tha se duhet që ajo të reflektojë gjithë vërejtjet e OSBE/ ODIHR përgjatë viteve ndërsa nënvizoi se ka shumë rëndësi krijimi i një qeverie teknike para zgjedhjeve të vitit të ardhshëm, gjë që sipas tij do të arrihet duke nxitur shoqërinë të ushtrojë presion dhe me mirëkuptimin e faktorit ndërkombëtar.

“PD duhet të punojë për të futur në Kushtetutë qeverinë teknike para zgjedhjeve, ku besimi mes palëve është masakruar pas përdorimit të krimit për të mundur opozitën. Shqipëria e ka jetike këtë. Nuk do ta arrijmë me luftë, por do kontribuojmë që shoqëria të bëjë presion dhe të kërkojmë kuptim nga aleatët ndërkombëtare për të arritur një qeveri teknike, jo vetëm për këto zgjedhje, por në fundin e çdo mandati”, u shpreh ai.