Vangjel Tavo është kandidati i PS-së për zgjedhjet në Bashkinë e Himarës që pritet të zhvillohen më 4 gusht.

Në lidhje me kandidimin e tij, Tavo u shpreh në një intervistë televizive se e mori propozimin nga Edi Rama dhe e pranoi pas një bisede me kreun e qeverisë. 

Nëse bëjmë një krahasim me të shkuarën, marrëdhënia mes tyre është rregulluar dhe tashmë Tavo pritet të kandidojë në Bashkinë e Himarës, e cila vitet e fundit ka ndryshuar disa kryebashkiakë. Para kësaj kandidature, në muajin mars Rama e vendosi edhe si prefekt të Qarkut të Vlorës. 

Më herët mes Tavos dhe Ramës nuk kanë munguar përplasjet, sharjet, akuzat dhe kundërakuzat në publik. 

Akuzat e Tavos më 27 prill 2021

Vangjel Tavo, i pari në listën e LSI-së në Gjirokastër, reagoi pasi kjo forcë nuk mundi të sigurojë as edhe një mandat në këtë qark në zgjedhjet e 25 prillit.

Me një postim në "Facebook", Tavo tha se garoi në kushte të pabarabarta dhe pati blerje votash, duke shënjestruar kështu Partinë Socialiste me në krye Edi Ramën. 

"Ju kam shërbyer me të gjithë zemër dhe kjo ka qenë kënaqësia më e madhe në jetën time publike. Siç jeni dëshmitarë, kjo betejë që sapo kaloi ishte në kushte tërësisht të pabarabarta. Ky nuk është aspak justifikim, por një fakt dhe një realitet që u pa dhe nga vetë ju. Në këto kushte të pabarabarta rrjedhimisht fitorja elektorale ishte e vështirë për t’u arritur", u shpreh ndër të tjera Tavo. 

Ai tha se çmimi për blerjen e votës kishte shkuar deri në 500 euro.

“Flitet për 500 euro, është rritur çmimi. Tashmë lekët e akumuluara nga hashashi vitet e kaluara e kanë bërë të vetën dhe do të harxhohen. Unë u them njerëzve që t’i marrin lekët se të vjedhura janë apo lekë droge, por votat t’i hedhin aty ku mendojnë. Lekët e vjedhura më mirë t’i kenë të varfrit se ata që i kanë", denoncoi ai.

Përplasja e prillit 2021

Më 8 prill 2021, gjatë fushatës elektorale, kur Edi Rama përuroi rikonstruksionin e Kishës së Shën Marisë në Dropull, Vangjel Tavo në atë kohë deputet i LSI-së, sulmoi Edi Ramën.

"O i paudhë, o i pamoral, o i padinjitet, o i pafe! Je panikosur për humbjen e pritshme dhe po bredh nëpër varreza, duke gënjyer dhe të vdekurit, por koha e regjimit tënd ka mbaruar", u shpreh Tavo ndaj Ramës. 

Nuk mungoi edhe një koment nga kreu i qeverisë, i cili tha: "Vangjo tepsixhiu i baba Likes dhe doktore Monës, kujton se do blejë përsëri vota me zarfe e presione greke në Dropull". 

Vrasja e Kostandinos Kaçifas 

Në fund të muajit tetor 2018, RENEA ekzekutoi me armë zjarri ekstremistin antishqiptar, Kostandinos Kaçifas, në fshatin Bularat të Dropullit.

Më 29 tetor, Vangjel Tavo akuzoi policinë shqiptare për vrasjen e ekstremistit Kostandinos Kaçifas, duke thënë se ai nuk donte të vriste askënd, por ishte duke mbrojtur kauzën si misionar i interesit të kombit të tij (grek).

Madje ai shkoi në familjen e ekstremistit të vrarë dhe doli kundër veprimit të shtetit të shqiptar. 

"Po, po e besoj dhe e kuptoj dhimbjen! Nese do të donte ta bënte, do ta kishte bërë. Kacifas nuk donte të vriste njeri. Nuk di çfarë të them... Të vetmen gjë që dua, të bëj thirrje të vijë trupi i djalit në shtëpi. Sa më shpejt", u shpreh Tavo.

Ky ishte një qëndrim kundër qeverisë shqiptare dhe kryeministrit Edi Rama, ku Kacifas u quajt ekstremist.

Në lidhje me këto veprime nuk mungoi edhe një reagim në rrjetet sociale nga Rama, i cili tha se Kacifas erdhi për të provokuar, hyri, turpëroi veten e flamurin e tij dhe iku.