Gjykata Kushtetuese ka shënuar një tjetër skandal duke rrëzuar me procedurë kërkesën e Jamarbër Malltezit, i cili e quante antikushtetuese masën e ‘arrestit shtëpiak’ ndaj tij.
Në një njoftim për mediat, Kushtetuesja bën me dije se, ‘vendosi rrëzimin e kërkesës, për shkak të mosformimit të shumicës së nevojshme vendimmarrëse prej 5 gjyqtarësh’.
Me këtë njoftim kuptohet se vendimmarrja e Gjykatës Kushtetuese ka qënë 4:4, duke mos arritur dot shumicën e nevojshme vendimmarrëse.
Gjykata Kushtetuese/ NJOFTIM VENDIMMARRJEJE
Në datën 05.12.2024, Gjykata Kushtetuese ( Gjykata) mori në shqyrtim çështjen me kërkues Jamarbër Malltezi, me objekt shfuqizimin e vendimeve nr. 112, datë 20.10.2023 dhe nr. 116, datë 23.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar; nr. 56, datë 21.11.2023 të Gjykatës së Apelit për Korrupsionin dhe Krimin e Organizuar; nr. 00-2024-384, datë 05.03.2024 të Kolegjit Penal të Gjykatës së Lartë, si të papajtueshme me Kushtetutën e Republikës së Shqipërisë.
Në përfundim të shqyrtimit të çështjes, Gjykata, bazuar në nenin 73, pika 4, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese”, të ndryshuar, vendosi rrëzimin e kërkesës, për shkak të mosformimit të shumicës së nevojshme vendimmarrëse prej 5 gjyqtarësh.
