Presidenti Ilir Meta, ka shprehur ngushëllime ditën e sotme për familjen e Agim Bucit, i cili humbi jetën pasi u qëllua për vdekje gjatë një tentative grabitje në biznesin e tij në Kamëz.

Me anë të këshilltarit të tij, presidenti Meta i ka uruar shërim të shpejtë, bashkëshortes së të ndjerit, e cila mbeti e plagosur në këtë ngjarje të rëndë.

Ndërsa nga ana tjetër, Meta ka kërkuar nga autoritet përgjegjëse kapjen e autorëve të ngjarjes dhe vendosjen e tyre para ligjit, për të marrë dënimin e merituar.

Presidenti i Shtetit, ka një apel të fortë edhe për institucionet përkatëse, duke u kërkuar atyre që të bëjnë më shumë për të garantuar sigurinë e jetës, paqen sociale, pronën e biznesin.

Madje shkon deri atje saç thotë se krimi po sfidon shtetin, duke u bërë një problem madhor për vendin tonë.

“Në emër të Presidentit Meta i përcolla sot ngushëllimet më të thella, solidaritetin njerëzor e institucional dhe mbështetjen e plotë, familjarëve dhe katër fëmijëve të qytetarit, Agim Buci, i cili humbi jetën nga përplasja me kriminelët që grabitën biznesin e tij.

Presidenti Meta i uron shërim të shpejtë Merita Bucit, bashkëshortes së të ndjerit, e cila mbeti e plagosur në këtë ngjarje të rëndë. Presidenti Meta duke dënuar me forcë këtë ngjarje, apelon kapjen e menjëhershme të autorëve të krimit, nxjerrjen e tyre para drejtësisë dhe dënimin me të gjithë fuqinë e ligjit.

Presidenti Meta apelon se duhet bërë ende më shumë për të garantuar sigurinë e jetës, paqen sociale, pronën e biznesin, përballë një problemi madhor, siç është krimi, që vazhdon të sfidojë shtetin por edhe të marrë jetë të pafajshme njerëzish, në mes të qyteteve tona. Presidenti Meta do të mbështesë dhe do t'i gjendet pranë gjithmonë katër fëmijëve dhe familjarëve të Agim Bucit", - deklaroi këshilltari Asllani në emër të Presidentit Meta.