Themelohet Këshilli i Ambasadorëve Shqiptarë: Vetëm në shërbim të interesave kombëtare

Hënë, 21 May 2018 16:48

Është themeluar së fundmi Këshilli i Ambasadorëve Shqiptarë, një organizatë e pavarur, jofitimprurëse. Këshilli u themelua nga një grup ish- ambasadorësh, sipas modelit që kanë organizatat e tilla në vendet demokratike.

Në një njoftim për mediat të shpërndarë nga ky Këshill thuhet se në përputhje me ligjin shqiptar Këshilli do të jetë një shoqatë e hapur për anëtarësim të të gjithë atyre që kanë dëshirë dhe plotësojnë kushtet e parashikuara në statutin e tij .

Pjesë nga njoftimi i Këshillit të Ambasadorëve Shqiptarë

Anëtarët e Këshillit të Ambasadorëve duhet të kenë mbajtur të paktën për një mandat postin e Ambasadorit ose të kenë qenë diplomatë të lartë, me funksione drejtuese në Ministrinë e Punëve të Jashtme për më shumë se pesë vjet. Të drejtën për t’u anëtarësuar në këtë Këshill e kanë edhe të gjithë ish – Ministrat e Punëve të Jashtme.

Po mbushen 28 vjet që Shqipëria u shkëput nga e kaluara e një regjimi stalinist, i cili na kishte izoluar nga bota e lirisë dhe demokracisë. Kjo për ne do të mbetet si periudha e korrigjimit të gabimeve të mëdha të historisë. Vendi ynë u bashkua më në fund me vlerat perëndimore. Marrëdhëniet ndërkombëtare filluan nga pika zero për të hyrë në një rrugë të re, që ishte rruga e bashkëpunimit, e solidaritetit, rruga e integrimit euro – atlantik. Sot Shqipëria është anëtare e Këshillit të Europës, anëtare e NATO-s, vend kandidat për në Bashkimin Eurpoian dhe qytetarët shqiptarë gëzojnë të drejtën e qarkullimit të lirë, pa viza, në hapësirën Schengen. Të gjitha sondazhet tregojnë se shoqëria shqiptare, krahasuar me vendet e tjera ish – komuniste, mbetet thellësisht pro – europiane, me mbi 90 për qind në mbështetje të objektivit strategjik të integrimit.

Pavarësisht alternancave politike të pushtetit, ky objektiv ka qenë gjithë kohën pika e bashkimit të shumicës qeverisëse me opozitën.

Gjatë kësaj periudhe është afirmuar një trupë diplomatike shqiptare me vizion rrënjësisht të ri, me mendje të hapur, përkushtim të lartë ndaj interesave jetike të atdheut dhe e aftë të përballojë sfidat e vështira dhe dinamike të integrimit. Brenda kësaj trupe diplomatike, sigurisht që ambasadorët kanë mbajtur një peshë të veçantë. Për arsye të moshës, por shpesh edhe për arsye të vendimeve politike të pushtetit të radhës, shumë nga këto personalitete që kanë mbajtur me nder mandatin e përfaqësimit të lartë të Republikës së Shqipërisë, janë tashmë jashtë sistemit të Ministrisë së Punëve të Jashtme. Ky fakt nuk e zhvlerëson aspak përvojën e tyre të pasur në fushën e politikës së jashtme dhe të marrëdhënieve ndërkombëtare. Këshilli i Ambasadorëve Shqiptarë u themelua pikërisht me qëllimin e mirë për të vënë përvojën e çmuar të këtyre personaliteteve në shërbim të kauzës së integrimit të pakthyeshëm.

Në qëndrimet e tij publike apo konfidenciale, ky Këshill do të qëndrojë me vendosmëri jashtë preferencave politike dhe vetëm në shërbim te interesave kombëtare, specifikisht lidhur me politikën e jashtme dhe marrëdhëniet ndërkombëtare të shtetit shqiptar, por edhe më gjerë lidhur me zhvillimet e rëndësishme në vend.

Fushat e veprimtarisë të Këshillit të Ambasadorëve Shqiptarë do të jenë të gjëra. Ato do të përfshijnë si analizën e historisë së Shqipërisë në marrëdhëniet ndërkombëtare, me qëllim rivlerësim të traditës së mirë, ashtu edhe analiza të zhvillimeve të ditës, për të ndihmuar në përmirësimin e praktikave dhe të strategjive diplomatike të shtetit shqiptar. Në shprehim gatishmërinë tonë për të ndërtuar një bashkëpunim të mirë me të gjitha institucionet e shtetit e posaçërisht me Ministrinë e Punëve të Jashtme.

Si pjesë specifike e shoqërisë civile shqiptare, ky Këshill dëshiron një dialog të përhershëm e të sinqertë me përfaqësitë diplomatike të vendeve mike si dhe me delegacionet e organizatave ndërkombëtare, të akredituara në Tiranë. Një dialog i tillë do t’i ndihmojë diplomatët miq t’i njohin më mirë Shqipërinë dhe shqiptarët, historinë, kulturën dhe aspiratat e tyre.

Këshilli i Ambasadorëve Shqiptarë do të vendosë pa vonesë lidhje me organizatat e ngjashme në vendet mike dhe do të përfshihet me kapacitetet e veta në veprimtari të përbashkëta me këto organizata, në dobi të qëllimit tonë të përbashkët për ta mbështetur thellimin e bashkëpunimit midis vendeve tona. Ne do të marrim pjesë aktivisht në programet dhe projektet e organizatave ndërkombëtare, me përparësi Bashkimi Evropian, lidhur me Shqipërinë apo me rajonin, me bindje se kontributi ynë do të jetë në të mirë të këtyre programeve dhe projekteve.

Është rasti gjithashtu t’i shprehim një falënderim të veçantë Këshillit të Ambasadorëve Amerikanë në Ëashington DC për ndihmesën e tyre të vazhdueshme qysh në fillimet e punës përgatitore për themelimin e organizatës tonë. Në mbledhjen e tij të parë dhe kostituimit të Asamblesë të Përgjithshme, bordi themelues zgjodhi zotin Besnik Mustafaj si President të Këshillit të Ambasadorëve Shqiptarë.

Lista paraprake e Asamblesë të Përgjithshme të Këshillit të Ambasadorëve:

(Në rend alfabetik)

Admirim Banaj

Agim Fagu

Agim Nesho

Arben Cejku

Arben Cici

Bashkim Rama

Besnik Mustafaj

Fatos Kërçiku

Flamur Gashi

Genci Muçaj