Jemi vetëm pak minuta nga fillimi i ndeshjes së Kombëtares me Izraelin dhe duket se Panucci e ka vendosur se cilët do të jenë shqiponjat që do na përfaqësojnë në ndeshjen e sotme.

Në 11-shen që do jetë në fushë sonte siç duket do të ketë edhe surpriza, pasi Egzon Binakun do të debutojë me kuqezinjtë, pasi ka fituar balotazhin me Agollin.

Mbrojtësi i portës është vendosur të jetë Thomas Strakosha dhe jo Etrit Berisha siç jemi mësuar ta shohim gjithmonë kombëtaren.

Në mbrojtje, Hysaj në të djathtë dhe Gjimshiti në qendër, janë siguritë e vetme të Panuccit, ndërsa Frederik Veseli duket favorit për të luajtur në krah të mbrojtësit të Atalantës, duke lënë në stol Mërgim Mavrajn, që vjen pas një periudhe të gjatë pa skuadër dhe në të majtë pritet të zbresë Binaku.

Në mesfushë tekniku italian pritet t’i besojë eksperiencës së Xhakës, Bashës dhe Memushajt, të cilët dinë të ruajnë balancat, duke mbyllur hapësirat në prapavijë dhe duke ndihmuar në organizimin e sulmeve.

Sa i përket sulmit, surpriza e vetme mund të jetë ish-sulmuesi i Skënderbeut, Enis Gavazaj, i cili mund ta nisë takimin si titullar në të majtë të sulmit, duke përfituar nga një gjendje jo optimale e Eros Grezdës, që vjen pas një dëmtimi të gjatë dhe nuk do të jetë gati për takimin e sotëm.

Në të djathtë të këtij reparti do të luajë Jahmir Hyka, i cili gëzon një formë mjaft të mirë dhe ka bindur Panuccin se mund të jetë i vlefshëm me depërtimet e tij, ndërsa duelin shkodran për majën e sulmit duket se e ka fituar sulmuesi i Oostendes në Belgjikë, Sindrit Guri.