“Arena Kombëtare” vazhdon të marrë formë dita ditës, punimet vazhdojnë me ritme të larta dhe pritet që të përfundojë brenda afatit të përcaktuar. FSHF ka publikuar pamjet dhe duket qartë që tashmë ka marrë formën e një arene futbolli. Skeleti i mbulesës së stadiumit është pothuajse drejtë përfundimit, ndërsa në të gjithë hapësirën ku do të montohen ulëset janë vendosur platformat e betonit.

Punimet tashmë vazhdojnë në tribunën VIP dhe në pjesën ku do të qëndrojë edhe media, po ashtu drejt përfundimit janë baret dhe restorantet që do të përdoren gjatë ndeshjes, por jo vetëm. Edhe skeletet metalike që do të mbulojnë stadiumin janë drejt përfundimit. Ndërsa me fushën nuk është filluar akoma asnjë punim, pasi nuk janë larguar akoma vinçat që kryejnë montimin e tyre në tribunat e stadiumit.

Drejtuesit e Federatës Shqiptare të Futbollit janë shprehur më herët se deri në fund të këtij viti do të ketë përfunduar pjesa kryesore e punimeve, ndërsa inaugurimi i stadiumit do të bëhet në fillim të vitit të ardhshëm.