Ekipi italian i Juventus është nën hetim nga institucioni më i madh futbollistik në Europë, UEFA, lidhur me transferimin e Cristiano Ronaldos.

Portugezi i dha fund aventurës me Real Madridin për të nënshkruar me kampionët e Italisë, Juventus. “Zonja e Vjetër” pagoi 99 milionë paund për të marrë shërbimet e pesë herë triumfuesit e “Topit të Artë”.

Calcio Mercato raporton se UEFA po shqyrton nëse është shkelur ndonjë rregullore në marrëveshjen rekord që arritën me gjigantët e Spanjës për kartonin e 33-vjeçarit. Ylli portugez ishte vetëm një prej lojtarëve ‘shtesë’ në blerjet që kryen në merkaton e verës, ku shpenzuan 217 milionë paund me blerjen e kartonit të Douglas Costas dhe Joao Cancelo.

Media italiane raporton se këto marrëveshje mund të kthehen për t’u ndjekur. UEFA do t’i shohë me vëmendje këto lëvizje nëse shpenzimet e tyre janë në përputhje me të ardhurat që kanë marrë.

Ndërkohë, kampionët italianë do të argumentojnë se si i kanë balancuar ato të ardhura me largimin e Mattia Caldara, Gonzalo Higuainit dhe e Gianluigi Buffon nga klubi. Ndërsa, rroga e Cristiano Ronaldos me vlerë 200 mijë paund në javë për katër vite kontratë gjithashtu ka zgjuar dyshimin te krerët e UEFA-s.