Eden Hazard ka folur përsëri për një transferim të mundshëm te Real Madridi, lëvizje të cilën ai e cilëson si ëndërr nga fëmijëria.

Hazard është golashënuesi më i mirë i Ligës Premier me shtatë gola, pas golit të fundit në fitoren 3-0 në Southampton dhe ai pranon se vendimi i tij i ardhshëm mund të përcaktojë të ardhmen e tij.

 “Po, për këtë kam folur pas Kupës Botërore dhe kam thënë se mendoj se është koha për të ndryshuar ambient, sepse kam luajtur një Kupë të madhe Botërore”, u ka thënë fillimisht Hazard gazetarëve në stadiumin St Mary’s.

 “Nuk dua të flas për këtë çdo ditë, nuk kam kohë, por së shpejti do të flasim për të ardhmen time. Mendoj se kur ju keni një ëndërr, sigurisht se doni ta bëni atë realitet”.

“Është sikurse e kam thënë shumë herë, nëse largohem do të jem i lumtur, por e di se nëse qëndroj, do të jem gjithashtu i lumtur”, përfundoi ylli belg.