Një situatë e turpshme dhe e papranueshme ka ndodhur në qytetin e Fushë-Krujës dhe viktimë e këtij akti skandaloz ka qenë Skënderbeu dhe lojtarët e tij. Kampionët e Shqipërisë udhëtonin në Fushë-Krujë për të zhvilluar takimin e radhës të vlefshëm për javën e 20-të të Kategortisë Superiore kundër Kastriotit, që siç dihet, ndeshjet si pritës nuk i zhvillon në stadiumin e tij në Krujë, por në fushën sportive “Redi Maloku” të Fushë-Krujës. Sipas denoncimit që ka bërë klubi korçar, rreth 25 persona, të cilët kanë qenë të pranishëm në mënyrë të paautorizuar brenda stadiumit, kanë goditur dhe dhnuar 3 nga lojtarët e skuadrës së Skënderbeut, Oto Xhon, Kristi Vangjeli dhe Idriz Toskiç. Por ajo që e bën edhe më të rëndë këtë situatë skandaloze, është fakti se në momentin e incidentit, në stadium nuk ka qenë asnjë forcë policie për të garantuar mbarëvajtjen e ndeshjes.
Reagimi i ekipit të Skenderbeut:
Skandal përpara fillimit të takimit të javës së 20-të, Kastrioti – Skënderbeu. Reth 25 persona të paautorizuar brënda stadiumit ‘Redi Maloku’ kanë goditur dhe dhunuar lojtarët bardhekuq , Oto John, Kristi Vangjeli dhe Idriz Toskiç
Asnjë forcë policie e pranishme në stadium për të ruajtur rendin dhe mbarëvajtjen e ndeshjes.
***
Frika mbizotëron në kampin korçar pas dhunës së turpshme ndaj lojtarëve të tyre. Në kushte të tilla, drejtuesit e Skënderbeut e kanë të pamundur të ruajnë qetësinë brenda ekipit, ndaj kanë kërkuar në stadium praninë e Forcave Speciale.
Vetëm në prezencë të tyre, lojtarët bardhekuq do të mund të vijojnë normalisht ndeshjen, në të kundërt e kanë të pamundur, pasi skandali që ndodhi pak çaste më parë, natyrisht që ndikon në psikologjinë e tyre.
Pas dhunimit të 3 lojtarë të Skënderbeut në Fushë-Krujë, reagoi menjëherë për “Panorama Sport” edhe presidenti Adrian Takaj. “Është e papranueshme që shkohet për të luajtur ndeshje në vitin 2019 dhe nuk as polici të shtetit dhe as polici private në stadium. Mbi 20 persona kanë sulmuar lojtarët tanë dhe në këtë moment po mendojmë të bojkotojmë ndeshjen. Është e tmerrshme që nuk ka siguri fare. Nuk e di nëse do të luajmë apo jo, kaq mund të them për momentin”, deklaroi presidenti Takaj.
