Duket e pamundur që Antonio Kasano mos prodhojë lajme! I ftuar në studion e emisionit “Tiki Taka”, ish-sulmuesi italian, tërboi bashkëshorten e Ikardit, Vanda Nara, teksa deklaroi që Mauro dhe Perisiç duhet të largohen nga Interi në fundin e sezonit.

Kjo gjë nuk i ka pëlqyer aspak Vandës, e cila ju kundërvu Kasanos, teksa ky i fundit, i solli ndërmend shembullin e brazilianit Ramirez, i cili refuzoi të rinovonte kontratën me Jingsu Suning, teksa drejtuesit vendosën të mos e aktivizonin më për 1 vit.

“Interi në qershor duhet të bëjë vetëm një gjë: Perisiç dhe Ikardi duhet të largohen. Është një problem i thjeshtë, rrëmujën në fillim e bëri Perisic dhe më pas e bëri ti.

Për këtë arsye, të dy duhet të largohen, edhe për faktin se duket qartë që Ikardin nuk e duan më tek Interi. Unë miqtë i kam në Bari, nuk kam miq në botën e futbollit. Informohuni pak çfarë ndodhi me Ramirez, te Jiangsu Suning! Refuzoi të rinovonte dhe ka një vit që bën vrap rreth fushe, nuk luan. Kështu do ndodhë edhe me Icardin”, u shpreh Kasano.

Nuk mungoi as reagimi i Vanda Narës, e cila u përpoq ta kalonte me humor deklaratën e 36-vjeçarit nga Bari.

“Ikardi do qëndrojë tek Interi, kjo është zgjedhja e tij. Të jetë për të, ai qëndron 150 vjet tek Interi, meqë Spaleti tha se do qëndronte 100 vjet”, deklaroi Vanda.