Skënderbeu dënohet me 10 vite jashtë kupave të Europës. Gjykata e Apelit e UEFAS ka lënë në fuqi vendimin për të dënuar ekipin shqiptar. Drejtuesit e Skënderbeut nuk e pranojnë këtë vendim ndërsa kanë paralajmëruar se do të shkojnë në KAS për të gjetur drejtësinë e mohuar nga UEFA.

I madh dhe i vogël priste vendimin e Apelit të UEFA-s në lidhje me dënimin e Skënderbeut me 10 vite përjashtim nga kompeticionet Evropiane dhe 1 milion euro gjobë. Një vendim që tronditi futbollin shqiptar dhe vendosi në pikëpyetje ekipin më të suksesshëm të dekadës së fundit të Shqipërisë. Sot pritej që të merrej vendimi i Apelit, por deri tani nuk ka ndodhur diçka e tillë.

Skënderbeu ishte në gjyq me 26 prill për të apeluar në UEFA vendimin e dhënë për 10 vite pezullim dhe 1 milion euro gjobë nga kompeticionet Evropiane. Në atë datë u mbajt dhe faza dëgjimore ku dëshmuan dhe vetë lojtarët e Skënderbeut në atë vit. Sabien Lilaj, Bledi Shkëmbi dhe Bakary Nimaga ishin të përzgjedhurit e klubit korçar për të folur. Dy të parët udhëtuan dhe dëshmuan në Zvicër, ndërsa Nimaga foli nga një video-konferencë. Dëshmia e tyre ishte shumë e gjatë, pasi dëshmuan për rreth 6 orë.

Megjithatë, klubi korçar doli menjëherë në një deklaratë për shtyp ku shprehte mosbesimin te Apeli i UEFA-s. “Në seancën e zhvilluar sot në Lozanë, para panelit kanë dëshmuar pjesëtarë të stafit drejtues, lojtarë aktualë dhe ish lojtarë të Skënderbeut, të cilët kanë mohuar kategorikisht akuzat e ngritura nga inspektorët e UEFA-s.

Duke marrë në konsideratë egzistencën e një marrëdhënie institucionale ndërmjet organeve gjykuese, Klubi i Futbollit ‘Skënderbeu’ rikonfirmon edhe njëherë mosbesimin për drejtësi në këtë fazë fillestare të procesit dhe shprehim edhe njëherë bindjen e plotë se strategjia e ndjekur nga bashkëpunëtorët tanë do të japë rezultatet e pritura në CAS, (Gjykatën e Arbitrazhit Sportiv)”, - shkruhej në një pjesë të deklaratës. Në fakt kjo deklaratë ka sens.