Eros Grezda, futbollisti i Osijek dhe kombëtares shqiptare, në sfidën që kuqezinjtë luajtën në mars kundër Norvegjisë pësoi një dëmtim që e la jashtë fushave të blerta për mjaft kohë.

Së fundmi ai është rikthyer të japë kontributin e tij dhe ndeshje pas ndeshje po merr vendin që i takon në skuadrën kroate. Në një intervistë të fundit për ‘super sport’ talenti gjakovar është shprehur se dëmtimi e ka bërë që të humbasë pak fuqi, por tashmë ndihet më mirë.

Në lidhje me merkaton, ai shprehet se ka shumë zëra por asgjë konkrete, ndërsa për Kombëtaren, Grezda thotë se po punon fort që të arrijë formën maksimale.

“Dëmtimi? Kisha probleme fizike para sfidës me Norvegjisë por nuk i ndjeva gjatë ndeshjes. Pas përfundimit të takimit kisha probleme të mëdha dhe ndodhi ajo që kisha frikë, mungova për një kohë të gjatë.

Kisha probleme me ligamentet në kavilje dhe rikuperimi shkoi 40 ditë. Isha në formë të mirë por kam humbur pak fuqitë. Do vazhdoj të luaj nga pak minuta deri sa të arrij formën që kisha para dëmtimit.

Kombëtarja për mua është e rëndësishme dhe është fat që ta vesh atë fanellë. Këto ditë do të punoj më shumë që të kthehem në formë dhe të jem gati për miqësoret kundër Kosovës dhe Ukrainës.

Ndihem mirë te Osijeku dhe kam vetëm pak probleme në aspektin fizik kur bëhet fjalë që të kthehem në mbrojtje dhe trajneri e di këtë gjë, madje më ka thënë që të luaj më shumë në sulm. Kam bërë një ndeshje të mirë dhe në fundjavë kemi një ndeshje ndaj Hajdukut. Synonim vendin e dytë ose të tretë por mirë jemi edhe në vendin e katërt pasi na intereson Europa.

Merkatoja? Mediat kroate më kanë lidhur me shumë klube dhe shtete por ka ende kohë, pasi nuk ka pasur gjë konkrete. Më intereson kampionati gjerman por javët në vazhdim do të qartësohet e ardhmja ime”, u shpreh Grezda.