110,5 miliardë lekë, ose 825 milione euro është dëmi ekonomik i konstatuar nga Kontrolli i Lartë i Shtetit për vitin 2017. Është kjo shifra e raportuar në Kuvend nga Kreu i këtij institucioni Bujar Leskaj gjatë seancës plenare në Kuvend. Leskaj ka paraqitur para deputetëteve raportin vjetor të KLSH, duke theksuar se gjatë auditimeve janë konstatuar mungesë përgjegjshmërie nga ana e titullarëve të institucioneve publike, standarde të ulëta profesionale e mungesë eficence nga institucionet.

“Parregullsitë dhe shkeljet financiare në të ardhurat dhe shpenzimet e kryera me dëm ekonomik shumën totale prej 11.5 miliardë lekë, ose 85.8 milionë euro. Shkeljet të disiplinës financiare me ndikim negativ në performancën e fondeve të shpenzuara nga subjektet e audituara në shumën totale prej 99.05 miliardë lekë, ose afërsisht 739.7 milionë euro, nga e cila 92.7 miliardë lekë në fushën e të ardhurave dhe 6.3 miliardë lekë në fushën e shpenzimeve jo me eficiencë, efektivitetet dhe ekonomicitet të fondeve. Në total janë konstatuar shkelje në shumën 105.8 miliardë lekë ose afërsisht 825.6 milionë euro”, tha kreu i KLSH.

Gjatë raportimit të Leskajt nuk kanë munguar as ngacmimet politike. Ish Kryeministri Sali Berisha i ka kërkuar Leskajt të evidentojë në raport me termin “hajdutë” qeveritarët të cilët janë shkaktarët e këtij dëmi kolosal ekonomik. Nga ana e tij Leskaj është përgjigjur se ai vete dhe institucioni i Kontrollit të Lartë të Shtetit e kanë detyrim ligjor të qëndrojnë jashtë ndikimeve politike.