Numri i lejeve të ndërtimit të miratuara ka qenë në rritje prej 3 vitesh tashmë, ndërkohë që ky bum po shoqërohet edhe me një bum investimesh, bazuar në vlerat që parashikojnë lejet e dhëna.

Kjo vlen veçanërisht për ndërtesat e reja jo për banim, ku vetëm në gjysmën e parë të vitit janë miratuar gati 8.3 miliardë lekë investime.

Investimet më të mëdha do të shkojnë për ngritjen e ndërtesave të reja industriale, të cilat kanë një efekt të dyfishtë pozitiv për ekonominë, pasi rrisin kapacitetet e sektorit të industrisë. Në periudhën Prill-Qershor, vlera e ndërtesa industriale kapi majën e viteve të fundit me 2.3 miliardë lekë investime të parashikuar për rreth 42 leje.

Në fokus të investime, veçanërisht pas shtimit të incentivave për strukturat akomoduese të turizmit, janë kthyer edhe hotelet dhe ndërtimet e ngjashme që do të presin turistë. Për këtë vlera e ndërtimeve të reja në këtë fushë arrin në 742 milionë lekë dhe nuk shfaq shenja ngadalësimi për të ardhmen.

Sa i përket llojeve të tjera të ndërtesave jorezidente, investimet mbeten të larta për ndërtesat tregtare, ndonëse në rënie të lehtë nga viti i kaluar. Ndërsa vlera e ndërtimeve të reja për zyra në këtë tremujor arriti në vetëm 92 milionë lekë, duke rënë ndjeshëm nga nivelet e vitit të kaluar, edhe pse duke kaluar tremujorin e dytë të 2017 dhe 2016.

Grafiku i mësipërm, i cili pasqyron edhe ecurinë në kohë të lejeve të vlerës së ndërtimeve, tregon një tendencë në rritje edhe për ndërtesat e tjera jorezidente, ku përfshihen ndërtesat si shkolla, objekte kulti, ndërtesa argëtimi, etj.

Sa i takon raportit me lejet e ndërtimit për banim, këto të fundit vijojnë të mbajnë vlerën më të lartë të investimeve, megjithëse hendeku është duke u ngushtuar vazhdimisht./scan