Shqipëria është vendi në të cilin shteti harxhon më pak për popullsinë në raport me ekonominë, ndër vendet e Ballkanit Perëndimor. Këtë gjë e konfirmon Banka Botërore në raportin më të fundit për rajonin.

Në listën e shpenzimeve publike përfshihen pagat, pensionet, asistenca sociale dhe ajo e papunësisë si dhe shpenzimet kapitale, ose shkurt investimet publike, pra çdo shumë parash të cilën shteti e kanalizon drejtpërdrejtë në interesin e qytetarit. Sipas Bankës Botërore, kjo normë në vendin tonë fiksohet në vetëm 20%, ndërkohë që grafiku e tregon qartë se në të gjitha vendet e tjera të rajonit, norma është bindshëm më e lartë, madje në mbi 30% në rastet e Bosnje Hercegovinës dhe Malit të Zi.

Pas Shqipërisë në renditje vjen direkt Kosova me një normë rreth 23%. Ky konstatim i Bankës Botërore vjen vetëm pak ditë pas të dhënave të bëra publike nga Ministria e Financave që flisnin për një dështim të planifikimit fillestar të buxhetit të 2018-ës për investimet dhe shpenzimet sociale.

Të dhënat e Bankës Botërore tregojnë qartë se, në raport me masën e ekonomisë, shteti shqiptar shpenzon shumë pak për qytetarët e vetë, dhe në këtë drejtim gara rajonale është përfundimisht e humbur; shteti shqiptar është më dorështrënguari në Ballkan me shtetasit e tij.