Skema e financimit të bujqësisë përmes granteve të dhëna nga Agjencia e Zhvillimit Bujqësor dhe Rural ka rezultuar në dështim. Në projektbuxhetin e vitit 2019 të hartuar nga Ministria e Financave nënvizohet fakti se ka pasur një nivel jashtëzakonisht të ulët faktik në 8 mujorin e 2018-ës, ku është realizuar vetëm 5 për qind e planit.

Konkretisht nga 2.6 miliardë lekë të akorduara për këtë qëllim, janë shpërndarë vetëm 164 milionë lekë. Po ashtu, performancë negative ka pasur edhe viti 2017, i justifikuar me argumentin se ka reflektuar periudhën tranzicionale të qeverisë teknike dhe pikërisht për rikuperim, u akordua një buxhet në rritje gjatë 2018-ës. Për vitin 2019 dhe dy vitet në vijim në projektbuxhet parashikohet që mbështetja financiare për fermerët të jetë rreth 1.8 miliardë lekë në vi.

Nëse shohim ecurinë e skemës së subvencioneve ndër vite, duke përjashtuar vitin aktual që ende nuk është mbyllur, rezulton se viti më i dobët ka qenë 2017-ta ku janë shpërndarë 210 milionë lekë, i ndjekur nga viti 2013 me rreth 847 milionë lekë. Ndërsa viti që ka pasur perfomancën më pozitive ka qenë 2015, ku për fermerët kanë shkuar rreth 1.5 miliardë lekë.