Lëkundjet e sizmike në Shqipëri po shkojnë drejt qetësimit. Kështu shprehet sizmiologu Edmond Nushi, i cili thekson se pavarësisht përsëritjeve lëkundjet kanë qenë me magnituda më të ulta.

"Zona ku zhvillohet aktiviteti sizmik është shumë afër Tiranës kështu që këto ngjarje kur kalojnë njëfarë pragu ndihen nga qytetarët dhe për rrjedhojë ata frikësohen. Në terësi aktiviteti është drejt një relaksimi. Edhe magnitudat që po vijojnë tani janë gjithmonë e më të ulëta", shprehet ai, raporton Ora News.

Ndërkohë Ministrja e Mbrojtjes, Olta Xhaçka, i bëri thirrje banorëve që i kanë banesat e dëmtuara të mos qëndrojnë deri në momentin që do të bëhet vlerësimi.

Në një dalje për mediat, Xhaçka njoftoi se ekzaminimet e ndërtesave do bëhen nga ekspertë shqiptarë dhe të huaj.

"Nëse shtëpia juaj është e dëmtuar, mos bëni vetë ekspertin, mos rrezikoni veten e familjen. Largohuni! Largohuni për në strukturat akomoduese, sic janë qindra shtretër në hotelet më të mira në Durrës, Tiranë, Lezh, Shëngjin apo Beratapo për tek të afërm tuaj nëse dëshironi, por largohuni deri në verifikimi e situatës nga ekspertët sepse situata në banesat me strukturë të dëmtuar është sot po aq e rrezikshme sa ditën e goditjes së madhe sizmike. Sot ka nisur vlerësimi i rrezikshmërisë së banesave nga ekspertë shqiptar e të huaj", u shpreh ministrja.