Hashim Thaçi i ka çuditur të gjithë me daljen e tij të sotme duke konfirmuar se po bisedojnë me Serbinë për të shkëmbyer territore, ndërsa e ka cilësuar emocional deklaratën e Pandeli Majkos se duke filluar nga 1 janari 2019 do të ketë heqje të kufirit Kosovë-Shqipëri.

"Ne jemi për heqje të kufijve sipas standardeve të BE-së me fqinjët tanë si Shqipëria, Serbia, Mali i Zi dhe Maqedonia. Kush flet për heqje të kufijve jashtë këtyre standardeve është emocional dhe bën deklarata emocionale", tha Thaçi duke sulmuar kështu drejtpërdrejt Pandeli Majkon.

Ndër të tjera Thaçi tha se Kosova nuk do t'i bashkohet Shqipërisë edhe pasi të ndajë territore me Serbinë.

"Shkëmbimi i territoreve me Serbinë nuk do të thotë që Kosova do t'i bashkohet ndonjë shteti tjetër. Bashkimi ynë do të bëhet në Bruksel. Ata që thonë këto duan të pengojnë bisedimet me Serbinë", vijoi Thaçi.

Më parë, Majko kishte shpjeguar se vendimi për të hequr kufijtë përmes lehtësimit të procedurave të kalimit ishte i qeverive të Haradinajt dhe Ramës duke theksuar se nuk ishte qendrimi i tij.