Nga Kastriot Dervishi
Bëjnë propagandë të pandërprerë, vendosin emra rrugësh, shkollash, etj, i quajnë “heronj” se kushedi çfarë kanë bërë. Po sa më shumë lexon për jetën e tyre, aq më shumë bindesh se e vërteta nuk është ajo që është thënë. “Heroi i popullit” Mustafa Matohiti ishte nëntoger i xhandarmërisë zogiste deri në 12.7.1937. Pas një lutje përunjëse ndaj mbretit, ai u rikthye në armën e xhandarmërisë, por u largua nga detyra sërish e u arratis në Greqi. Me ardhjen e regjimit fashist, me kredencialet e të “persekutuarit” u përfshi në administratë si kryetar i Komunës së Dukatit, sipas dekretit të mëkëmbësit Françesko Jakomoni më 24.9.1939. Punoi goxha, madje u dërgua edhe në Itali për t’u kuruar. Rrogat për "antifashistin" vijonin rregullisht.
