Nga Kastriot Dervishi
Përveç dosjeve të përpunimeve të Vilson Blloshmit e Genc Lekës, e rëndësishme është të shihet edhe dosja e Bedri Blloshmit, vëlla i të parit dhe kushëri i të dytit. Më 10.3.1975 operativi Xhevat Karriqi harton biografinë e parë për Bedri Blloshmin. Këtu shënohej se familja kish mbajtur qëndrim pro regjimit të Zogut, ndërsa një kushëri i parë (Haziz Blloshmi) kishte qenë major. Familja ishte e lidhur me Ballin Kombëtar gjatë luftës, ndërsa daja Sabri Spaho kish qenë komandant. Shënohej një kushëri i tretë dikur me Ballin. Familja ishte cilësuar kulakë. Babai Sami Blloshmi dhe xhaxhai i tij ishin dënuar. Po ashtu përmendej babai i Genc Lekës, Bardhoja dhe lidhja me të. Biografia ishte hartuar me ndihmën e komunistëve Ramadan Gurra, Salë Rradaku dhe b.p. “Gurra”. Për ta lidhur punën e “armikut” me dëmtimin e rendit socialist, fillimisht, më 15.3.1975 me propozim të Xhevat Karriqit dhe me miratimin e shefit të Seksionit të Degës së Punëve të Brendshme Librazh, Spiro Lera, merret vendimi për nisjen e përpunimit paraprak. Brenda kohës së caktuar, më 12.8.1975 Bedri Blloshmi, me propozim të operativit Xh.Karriqi e miratim të kryetarit të DPB Librazhd Emro Kondi ngrihet menjëherë në përpunim aktiv 2A. “Pazari i Muzinës” (Hasan Alliu) raporton në drejtim të tij. Më 30.3.1976 me propozim të hetuesit Lulo Ymeri, operativit Xh.Karriqi dhe miratim të Emro Kondit (firmë nuk ka) hartohet plani i masave agjenturialo-operative në drejtim të Bedri Blloshmit, duke parashikuar kthimin në proces dëshmie të kallëzimeve të Ferit Çotës dhe Rexh Sulës, të bëhej një kontroll në banese, etj. Ndërkohë Bedriu u thirr më 1 prill u thirr për sqarime në Degën Ushtarake, por u dërgua në DPB dhe më 3.4.1976 u arrestua. Paralelisht me përpunimin e Bedriut, ishte hapur problemi i centralizuar “Shpartallimi”, kundër “personave që zhvillonin veprimtari të mprehtë armiqësore në formën e agjitacionit e propagandës apo sabotimit”. Në këtë fazë të përpunimit, nuk sillen prova, për një përpjekje e hetuesisë dhe Sigurimit për të nxjerrë diçka nga “zbërthimi” në biruca. “Të gjithë këta që më marrin mua në pyetje janë të paaftë dhe mua nuk më zbërthejnë dot sepse unë do të rezistoj”. Më 5.7.1976 miratohet një tjetër plan masash, tashmë për problemin e centralizuar “Gaforrja”, ku implikoheshin 8 persona. Ishin futur në këtë “grup” edhe Vilson Blloshmi dhe Genc Leka. Për ndjekjen e problemit u ngrit një problem punë i drejtuar nga kryetari i DPB Librazhd Merdar Hasa me anëtarë: zëvendëskryetarin Spiro Lera, operativin e drejtimit për mbrojtjen e ekonomisë socialiste Sabri Musai dhe operativi i zonës së Qukësit Xhebat Karriqi. Sipas planin bashkëpunëtorët e birucave “Lundronjësi”, “Gjalpi i verdhë” dhe i dënuari S.K. do mbaheshin në lidhje nga kryetari e nënkryetari. Gjithë ideja ishte të dilej se ishim para një grup të organizuar, ku sigurisht, njëri prej tyre do ishte një bashkëpunëtor i futur prej vetë regjimit. Procesi gjyqësor u zhvillua më 6-13 qershor 1977. Gjykata Popullore Librazhd e drejtuar nga Subi Sulçe, me pjesëmarrjen e prokurorit Qani Lavdari, e akuzoi Bedri Blloshmin në bazë të neneve 72 dhe 12, 28 të Kodit Penal duke e dënuar me 25 vjet burgim dhe konfiskim të pasurisë. U la në fuqi me vendimin nr.202, datë 2.7.1977 të Kolegjit Penal të Gjykatës së Lartë të përbërë nga Eleni Selenica (kryetare), Ali Zanko (anëtar), Sofokli Krongo (anëtar relator). Prokuror ishte Pandi Konomi. Më 8.8.1978 dosja me numër themeltar nr.1594 u arkivua pranë Kartotekës së DPB Librazhd. Dosja vijon më tej në vendet ku Bedri Blloshmia vuan dënimet (do tregohet në shkrime vijuese).
Skeda e përndjekjes së Bedri Blloshmit
15.3.1975 në përpunim paraprak
12.8.1975 në përpunim aktiv 2A
1.4.1976 ndalohet e më pas arrestohet
3.5.1985 në përpunim aktiv 2A
30.7.1985 demaskohet si “armik” në Spaç
29.3.1991 lirohet nga burgu
