Ministri i Punëve të Brendshme, Mehmet Shehu, me një shkresë të datës 1.10.1953, urdhëroi mbylljen e kampeve nr.5 në Tiranë (Kamëz, fabrikës së tullave) dhe nr.6 të Tepelenës dhe zhvendosjen e të internuarve në Lushnje. Të internuarit në fazën e mbylljes së kampeve tela me gjemba, punonin 47 veta në Kampin nr.2 Vlashuk dhe 200 në Kampin nr.5 Tiranë (Kamëz). Në kampin tjetër të Tepelenës nuk punohej, pasi atje ishin grumbulluar ata që nuk ishin në gjendje pune.

Zhvendosja e të internuarve nga Vlashuku për në Shtyllas u bë më 22.10.1953, disa ditë para zhvendosjes së të burgosurve. Të njëjtën ditë është bërë edhe zhvendosja e 200 të internuarve nga Kampi nr.5 Kamëz në fermën “Çlirimi” Lushnje, pikërisht atje ku rrinin “monarko – fashistët grekë”.