Në 14 – 15 korrik 1955 kampi nr.2, i cili ishte formuar në vitin 1951, u zhvendos në Rinas të Tiranës. Këtu ndërtohej aerodromi i ri i Tiranës, një prej veprave më të mëdha të regjimit. Kampi punoi këtu për 4 vjet deri në vitin 1959. Këtu ishin arratisur 2 të dënuar të cilët ishin kapur më vonë. Punimet mbaruan më 8 shkurt 1959. Ngutja e punimeve u bë sepse në maj 1959 në Shqipëri do të vinte sekretari i përgjithshëm i Partisë Komuniste të Bashkimit Sovjetik, Nikita Hrushov. Edhe këtu kishin shpërthyer dekoratat për kolektivin e atyre që ruanin të burgosurit. Puna këtu ishte gërmimi me imtësi i tokës së aerodromit e cila nuk duhej të kishte asnjë rrënjë barishte poshtë. Pas këtij gërmimi, filloi shtrimi me gurë e më pas betonimi i thellë.
Kampi nr.2 raportonte se gjatë vitit 1955 kishin hyrë në repart 256 të dënuar politikë dhe 498 ordinerë. Në fund të vitit 1955 kampi kishte një trupë prej 617 të dënuarish politikë dhe 199 ordinerë, gjithsej 816 vetash. Efektivi mesatar gjatë vitit vlerësohej në rreth 870 të burgosur.
Në bazë të urdhrit nr.1620, datë 21.12.1955 reparti mori numrin 303.
Kampi nr.303, sipas organikës së datës 25.4.1956, duke qenë i ngjashëm edhe me kampet nr.305 dhe 309, kishte këtë përbërje:
-Komandanti, nënkolonel, 6000 lekë
-Zëvendëskomandanti për punë politike, major, 5500 lekë
-Zëvendëskomandanti për stërvitjen, major, 4500 lekë
-Zëvendëskomandanti për prapavijën, major, 4500 lekë
-Referent operativ Sigurimi, kapiten I, 4200 lekë
-Referent evidence, toger, 3600 lekë
-Radistë, mareshallë, (3)
Prapavija:
-Shef i prapavijës (dhe zëvendëskomandant)
-Referent ushqimi, kapiten I, 3900
-Magazinier ushqimi, mareshall
-Referent i financës
-Llogaritar për të burgosur
-Kuzhinier (ushtarë), (2)
Repartet e shërbimeve:
-Toga e brendshme: komandanti, nënoficerë të kontrollit të brendshëm (7), nënoficerë roje në punë (9)
-Toga e shërbimit të jashtëm: komandanti, nënoficeri për qenin (3), komandant skuadre (6), ushtarë (65)
