Policia e Shtetit ka reaguar zyrtarisht për lajmin e publikuar në media, se kreu i PD-së Lulzim Basha është vënë në përgjim dhe survejohet nga Forcat Operacionale.

Në reagimin e Policia së Shtetit, thuhet se lajmi në fjalë është i pavërtetë edhe është bërë me synim mashtrimin dhe keqinformimin e opinionit publik.

Por si asnjë herë më parë, Policia e Shtetit ka marrë guximin që të komentojë lajmin, dhe duke e cilësuar si të fabrikuar në zyrat e ndonjë partie politike.

Me këtë deklaratë, lajmi bëhet akoma më i vërtetë, pasi në fakt, reagimi i Policisë së Shtetit, duket sikur është shkruar në Selinë e PS-së.

Reagimi i plotë i Policisë:

Përgënjeshtrim rreth lajmit se familja Basha mbahet nën survejim - përmbajtja e shkrimit, një spekulim mediatik për qëllime të mbrapshta

Lidhur me shkrimin e botuar në gazetën “Panorama”, të datës 1 qershor 2018, me titull “Hije skandali, Policia mban në survejim familjen Basha”, sqarojmë se:

Nuk është aspak e vërtetë që familja e z.Lulzim Basha, kryetar i PD-së, apo familjarë të tij, të mbahen nën vëzhgim nga forca policore.

Përmbajtja e shkrimit është tërësisht një spekulim  mediatik me synim mashtrimin dhe keqinformimin e opinionit publik për qëllime që i gjykojmë të mbrapshta. Me keqardhje konstatojmë se lajmi në fjalë duket i fabrikuar nga zyrat e një partie politike dhe jo nga redaksi serioze.

Informimi i publikut rreth veprimtarisë së institucioneve të shtetit është një e drejtë e garantuar me ligj, prandaj nëse dikush do të kishte interes rreth së vërtetës, do ta merrte informacionin lehtësisht në rrugë zyrtare.

Fakti që asnjë nga institucionet e përmendura nuk është kontaktuar nga media në fjalë, na krijon dyshimin se në këtë rast kemi të bëjmë me keqpërdorim flagrant të një gazete nga ana e politikës.

Me këtë rast theksojmë se z.Basha përfiton nga statusi si kryetar i opozitës, masa shtesë dhe shoqërohet nga forca të Gardës së Republikës.

Por nuk ka në asnjë moment dhe në asnjë rrethanë, monitorim survejues të tij nga strukturat e Policisë së Shtetit.

Duke vlerësuar rolin e medias, Policia e Shtetit është e gatshme për t’iu përgjigjur çdo çështjeje me interes publik, në funksion të mirinformimit të qytetarëve.

/55News.al/