Presidenti i Republikës Ilir Meta dekoroi sot mjekun Grei Malo, për sakrificën e lartë dhe profesionalizimin që tregoi në ditët e rënda të tërmetit për të shpëtuar  dhe ndihmuar njerëzit e mbetur nën rrënojat e godinave të shembura.

Vetë Presidenti në një mesazh në Fb tregon sot: "Me nderim dhe mirënjohje të thellë, pata sot privilegjin të vlerësoja me Titullin e lartë “Për Merita të Veçanta Civile”, mjekun hero Grei Malo, i cili zbriti në terren menjëherë pas goditjes së tërmetit tragjik të 26 nëntorit, duke hyrë nën rrënoja e shpëtuar jetë njerëzish në të gjitha zonat e dëmtuara, dhe spikati me kontributin e tij të veçantë humanitar si anëtar i Qendrës Vullnetare të Emergjencave Civile, për shpëtimin e të riut Klajdi Qato.

Mirënjohje Grei Malos që dha një shembull të jashtëzakonshëm të sakrificës dhe profesionalizmit, duke na bërë krenarë dhe gëzuar respektin e të gjithë shqiptarëve!

Mirënjohje të gjithë anëtarëve të Qendrës Vullnetare të Emergjencave Civile!"