Kryetari i PD, Lulzim Basha, në bashkëbisedimin që pati me banorët e fshatit Tarin të Fushë Krujës, të dëmtuar nga tërmeti, mbetur pa strehë në çadra në mes të dimrit, u tha atyre se nëse qeveria do të kishte akorduar 150 milionë dollarët e destinuara për koncensionet, problemi i të gjithë të prekurve nga tërmeti do të ishte zgjidhur. “Sillet e përdridhet, justifikime, sebepe, e vetmja gjë që nuk bën, - tha Basha, - është: Po, do t’i anulojmë!”
“Dështimi për t’u ardhur në ndihmë njerëzve është tërmet i korrupsionit dhe i babëzisë, nënvizoi kreu i opozitës. - Është korrupsion. Mos t’u vish në ndihmë njerëzve është krim dhe korrupsion, kurse ndarja e njerëzve në të nënës e të njerkës është krimi më i shëmtuar. Tregon që këta kanë marrë fund, vetëm qeveri nuk janë më. As bandë nuk janë më. Këta janë të pashpirt.
Po ta kishin marrë këtë punë seriozisht, dy gjëra i kishin bërë: E para e punës, çadrat në fillim janë të pashmangshme; mbas kësaj të merrnin masa për strehim të përkohshëm me kontenierë dhe pastaj paratë në dorë në bazë të dëmit. Kaq është dëmi, kaq janë paratë, që ju t’i ndërtoni vetë, se ndryshe nuk i dilet kësaj pune.
Kam një muaj që i them hiqi lekët e oligarkëve. Mjaftojnë ato për të zgjidhur problemin në të gjithë zonën rurale dhe në pjesën më të madhe të zonës urbane të goditur nga tërmeti. Një muaj. Një muaj. Sillet e përdridhet, justifikime, sebepe, e vetmja gjë që nuk bën është : Po, do t’i anulojmë! Kjo është gjendje e jashtëzakonshme. 150 milionë dollarë do t’i merrnin dhjetë shokët e mi, hajdutëri e pastër, asnjë vlerë nuk ka për njerëzit. Dhe po të kishte vlerë, vlerë më të madhe se t’i vejë në ndihmë njerëzve nuk ka. “Do t’i anuloj, këto lekë të shkojnë për njerëzit.”. veç llafe, veç gënjeshtra, veç mashtrime për të fshehur mashtrimin. “
Kjo deklaratë e kryedemokratit, erdhi pasi një zotëri, baba i tre fëmijëve, i qau hallin Bashës më herët: "Kemi patur nevojë për njerëz. Le të mos sillte shteti asgjë, vetëm të na shikonte. Kanë ardhur vetëm vullnetarët nga Bubqi dhe Teatri”, – tregoi kryefamiljari, shtëpia e të cilit ishte dëmtuar që në 21 shtator dhe prej 3 muajsh jetonte në çadër. “Ne kërkojmë vlerësimin e shtëpisë”- tha një tjetër. “Çdo gjë deri tani është selektive. Nuk ka asnjë informacion se çfarë do të bëhet me ne."
