Kryeministri Edi Rama mezi u mbush me frymë kur nisi një tjetër tiradë ndaj opozitës dhe kritikëve, teksa këtë herë u shfaq nga zyra e tij.
Prej andej inskenoi një video sikur ishte duke punuar mbi disa dokumente.
Në kohën që homologun e tij italian e kanë bërë ‘copë’ me kritika vetëm pse bëri një komunikim live në Facebook, pa praninë e gazetarëve, Edi Rama vazhdoi gjuhën e terrorit, madje duke e vazhduar inskenimin edhe me zhurmën e sirenave në sfond.
“Ta shohin dhe ta qepin gojën ata që thonë dil nga shtëpia,” tha Rama, duke tentuar t’u mbushë mendjen njerëzve se ai qëndron në zyrë.
“Mirë gomari që na ngordhi, por duhet të merremi edhe me mizat. Unë në shtëpi mbyllem në fundjavë se nuk i përkas racës së keqe të atyre që thonë bëni siç them unë, mos bëni siç bëj unë Realisht është kulmi që edhe në këtë kohë kolere të vazhdojnë broçkulla,” tha Rama.
Në fund, para se të mbushej me frymë dhe të fliste për situatën, Rama tha diçka që do e bënte këdo që të qeshte.
“Nuk është as koha për dukje, nuk jam tipi i dukjeve të shtirura,” tha njeriu që e ka gjithçka falë dukjes, vetëm prej formës, asnjëherë falë përmbajtjes.
Madje e tha këtë, pasi kishte inskenuar gjithçka vetëm për... dukje.