Një paciente në Sanatoriumin e Tiranës ka arritur sot të dalë nga intubimi dhe lajmi është përcjellë si një arritje e madhe nga mediat dhe ekspertët e fushës. Por kjo nga ana tjetër fsheh nga pas edhe dëshpërimin se ata që pëfundojnë në intubim dhe ventilator, e humbasin betejën për të jetuar.

Por përse në Shqipëri është krijuar një situatë e tillë e rëndë dhe paradoksale, ku deri dje asnjë pacient nuk ishte ekstubuar, d.m.th nuk kishte dalë nga kthetrat e vdekjes?

Duket se ka tri arsye për këtë.

E para, mungesa e testimeve. Strategjia e gabuar e diagnostikimit e me tej e menaxhimit të drejtë dhe në kohë e pacientit. Kur dikush merr 127 dhe i kërkon të bëjë testin pasi ka temperaturë, humbje të shijes, lodhje etj, përgjigja që merr është thjesht: “rri në shtëpi e pi paracetamol”. Ky pacient mund të ketë dhe sëmundje shoqëruese si diabet, tension, probleme në zemër etj, dhe së bashku me koronavirusin, pacientit i prishet gjithë balanca e trupit. Sipas direktivës së Ministrisë së Shëndetësisë, atij i bëhet testi kur i nisin problemet e frymëmarrjes dhe e ka të pamundur të suportojë jetesën duke ndenjur në shtëpi. Por, kur ky pacient vjen në spital, gjendja e tij është shumë e rënduar dhe mundësia që i lihet stafit mjekësor për trajtim është e limituar.

E dyta lidhet me cilësinë e respiratorëve. Edhe 5 respiratorët e fundit që u blenë, megjithëse duhet të vinin 50 nga një firmë gjermane- erdhën vetëm 5, të cilët janë të një firme kineze. Nga informacionet e marra nga stafi mjekësor që i përdor, thuhet që “është e kotë të trajtosh pacientë me ata respiratorë”. Pyetja që lind është pse iu dha tenderi i respiratorëve një firme pa eksperiencë? Sot që firma ka sjellë vetëm 5 respiratorë dhe jo 50 sa kishte kontratën, çfarë do bëhet me këtë procedurë? A do i mbahet garancia e kontratës? A do përjashtohet nga prokurimi publik në vazhdim për mosrealizim kontrate dhe mashtrim?

E treta lidhet me spitalin ku u trajtuan. Pse u mbajtën pacientet e intubuar në repartin e Infektivit kur dihet që stafi aty nuk ka eksperiencë për një trajtim të tillë? Kjo është dhe arsyeja pse pacientët e fundit janë transferuar natën për në Sanatorium. Pse nuk u mendua më parë që pacientët e intubuar të trajtoheshin në spitalin e Sanatoriumit?