Kryetari i Partisë Demokratike Sali Berisha deklaroi se çdo kandidat per zgjedhjet qe del nga grupi i Alibeajt, është kandidat i Edi Ramës. Ai akuzoi shefin e qeverisë se kërkon të zhdukë opozitën dhe Partinë Demokratike. Berisha tha se Kryeministri Rama dhe Lulzim Basha janë të lidhur bashkë në marrëveshjen mafioze të Portit të Durrësit.

Lideri demokrat Sali Berisha reagoi ndaj njoftimeve, sipas të cilave grupi i Alibeajt do të prezantojë së shpejti kandidatët për zgjedhjet vendore të 14 majit. Duke folur për gazetarët, Berisha tha se ata do të jenë kandidatë të Edi Ramës dhe akuzoi shefin e qeverisë se kërkon të zhdukë opozitën në vend.

Berisha: “Çdo kandidat që del, gjoja, është në emër të Edi Ramës. Kjo është shumë e qartë, ne e kemi përcaktuar Edi Ramën si armikun numër një të PD-së, si njeriun që kërkon të zhdukë opozitën dhe PD-në, por si njeriu që do të marrë përgjigjen më ndëshkuese për këto veprime, pasi PD është në të drejtën morale dhe kushtetuese për të qenë opozitë e pavarur.”

Berisha tha se kryeministri Rama dhe Lulzim Basha janë të lidhur bashkë në marrëveshjen mafioze të Portit të Durrësit.

Berisha: “Ju e shihni sot, përfytyroni për një moment, kjo marrëveshje ishte për tragjedinë e Shqipërisë, marrëveshje opozitë-pozitë, por jo si formacione politike, por si persona hajdutë.

Klani Rama dhe klani Basha, kjo është e faktuar. Ai që ishte, se ka njerëz që më thonë pse e thua, se e them për të vërtetën, se ai ishte administrator i simfonisë, ishte administrator edhe i Ramës, edhe i Bashës.

Ky njeri tha se dha dorëheqjen nga ndërmarrja e Bashës dhe jo nga simfonia. Por pas një muaji rezultoi se ishte sërish te të dyja. Pra, kjo ishte pika e mjaltit. Kjo do ishte e tmerrshme, opozita e blerë me marrëveshjen mafioze të Portit të Durrësit!”