E përditshmja spanjolle “Mundo Deportivo”, shkruan se ylli i Paris Saint-Germainit Neymar është i gatshëm të kthehet në Barcelonë në të ardhmen. Mundo raporton se sulmuesi ia ka ofruar shërbimet ish-klubit të tij në disa raste dhe se kampionia e Spanjës tani është duke e konsideruar arritjen e një marrëveshjeje për të.

Pas një vere në të cilën ylli brazilian u përfol si galaktiku i radhës i rivalit të përjetshëm të Barçës, Real Madridit, situata duket se tani ka marrë një kthesë të papritur.

Gazeta spanjolle në faqen kryesore të ballinës ka vendosur këtë lajm me titullin: “Neymari nuk është i pamundur”. Ky pohim është bazuar kryesisht në faktin se vetë lojtari ka bërë të qartë gatishmërinë e tij për t’u kthyer në “Camp Nou”, duke e bërë Barcelonën ta konsiderojë mirë opsionin që më parë nuk ka qenë në tavolinë.

“Barça nuk po e hedh poshtë më. Drejtuesit e klubit do të kërkojnë ta arrijnë marrëveshjen vetëm nëse stafi i trajnerëve e jep dritën e gjelbër”, shkruan Mundo Deportivo, duke e hedhur topin në anën e Ernesto Valverdes.

Nëse trajneri i Barcelonës e aprovon, atëherë klubi do t’i nisë negociatat për ta kthyer brazilianin në Katalonjë.