Futbollisti kosovar Betim Lumi ka nënshkruar kontratë njëvjeçare me nënkampionin e Shqipërisë, Kukësin.

Mesfushori 18-vjeçar ka vendosur të qëndrojë, për të paktën edhe një vit tjetër, në klubin e Superligës shqiptare. Ai ka thënë se synimi i tij është të tërheqë oferta nga ndonjë klub i rëndësishëm evropianë, shkruan Gazeta Express.

”Arsyeja pse kam vazhduar me Kukësin është se ky është një klub që gjithmonë synon të luftojë për titull kampioni dhe ngrohtësia që ma ka ofruar stafi dhe bashkëlojtarët. Ndër arsyet të tjera është edhe pjesëmarrje e klubit në garat evropiane”, tha Lumi.

Lumi ka për qëllim ta bindë trajnerin e Kombëtares U-21 ta rikthejë në skuadër për ndeshjet kualifikuese të Kampionatit Evropian U-21, që do të mbahen këtë vit.

Kosova është pjesë e Grupit 3 së bashku me Kombëtaren e Shqipërisë U21. Në të njëjtin grup është edhe Anglia, Austria, Turqia dhe Andorra.