Federata Shqiptare e Futbollit reagon kundrejt klubit të Partizanit. FSHF-ja u është përgjigjur me të njëjtën monedhë të kuqve. Akuzat e tyre se FSHF ndikon në ndeshjet dhe rezultatet e ekipeve me përzgjedhjen e gjyqtarëve nuk janë anashkaluar nga Institucioni më i lartë i futbollit në vendin tonë. Kryeqytetasit në deklaratën e tyre ditën e djeshme, akuzuan direkt FSHF-në duke e etiketuar si maskaradë gjyqtarin Blerim Ziri, por dhe FSHF si një institucion të tillë.
Federata e jep mesazhin për ekipin e Partizanit, por në fund mundohet ta zbusë me një ulje tonesh nga skuadrat pjesëmarrëse në këtë kampionat duke kërkuar gjakftohtësi.
Deklarata - "Duke marrë shkas edhe nga qëndrimi i fundit zyrtar i klubit të futbollit Partizani për ndeshjen e fundjavës në Lushnje, FSHF shpreh keqardhjen e saj për gjuhën vulgare të përdorur, dhe krejtësisht jo fair. Dështimet e sezonit të një skuadre, apo një tjetre nuk mund ti faturohen kurrsesi FSHF-së. Duke qenë se aludohet, dhe shpesh prodhohet alibia që FSHF dirigjon pengimin e Partizanit në arritjen e objektivave të tij, atëherë në suksesin e pesë ndeshjeve radhazi të klubit Partizani para pak javësh, FSHF paska qenë faktor? Këto janë thjesht paragjykime emotive në këtë pjesë të fundit të sezonit.
Përveç arbitrit në fushë, ndeshjen e gjykon edhe publiku si një futbolldashës, dhe jo në pozitat e një tifozi të sëmurë. Ndaj ne e ftojmë atë (publikun) të shohë takimin e Lushnjes ndaj Partizanit për gjithçka dha ajo ndeshje në fushë, nga ana e të dyja skuadrave, përpara se të gjendet një armik për mosarritjen e objektivit. Çdo rezultat është pjesë e lojës, dhe produkt i përgatitjes dhe performancës, si edhe pashmangshmërisht, edhe fatit për secilën skuadër. Ky është një moment që kërkon më shumë gjakftohtësi dhe përqëndrim në realizimin e objektivave finalë të të gjithë aktorëve të garës. Kjo shërben shumë më tepër, sesa një recetë gjaknxehtësie", - shkruhet në deklaratën e FSHF-së.
