Menjëherë pas humbjes me Napolin në dhomat e zhveshjes së Juventusit ka patur tensione. Mësohet se portieri dhe kapiteni i skuadrës, Gigi Buffon, i fundit që la fushën pasi përgëzoi kundërshtarët për fitoren, u ka ngritur zërin shokëve të skuadrës.

Qëndrimi i kapitenit të Juves nuk është pritur mirë nga një pjesë e lojtarëve, veçanërisht nga mbrojtësi Benatia, i cili ishte përgjegjësi kryesor në golin e shënuar nga Koulibaly.

Klubi bardhezi po përjeton një situatë të vështirë, që nisi me eliminimin nga Reali i Madridit në çerekfinale të Championsit, për të vijuar më pas me grumbullimin e vetëm katër pikëve në tre takimet e fundit në Serinë A.

Pas fitores 3-0 me Sampdorian erdhi barazimi i papritur 1-1 në fushën e Crotones dhe humbja në minutën e fundit të kohës së rregullt me rivalët për titullin e Serisë A, ecuri që nuk pranohet kollaj nga Juventusi.

Situatë kjo që e ka shtyrë 40-vjeçarin të kërkojë llogari, pasi nuk ka ndërmend t’i thotë lamtumirë futbollit të luajtur duke i humbur trofetë njëri pas tjetrit. Buffon ka dashur ta shkundë dhe karikojë grupin para nisjes së përgatitjeve për një tjetër përballje shumë të rëndësishme me Interin në “San Siro”. Nuk është hera e parë që kapiteni i bardhezive bën “të fortin” në momentet delikate, duke marrë menjëherë përgjigjen e duhur në fushë nga shokët e ekipit.